حصة التعبير ... وأنا في المدرسة كان عندي حصة كويسة .. مترتبة ومتستفة .. متظبة ومقطقطة .. اسمها حصة التعبير .. كنت بحبها اووي .. لاني فيها ببقي حرة .. بكتب اللي بحبه .. اه كان العنوان مش انا دائما اللي بختارة .. بس بجد كانت متعه .. وكان التعبير هو اللي بيعلي درجاتي في مادة اللغة العربية كلها .. اللي كنت بحبها .. وغريبة كان لي مواقف مع اساتذة حصة التعبير بالذات .. رغم ان ذاكرتي ضعيفة .. بس بصراحة المواقف كانت ظريفة .. خلتني اتنبه إني بعرف أكتب .. وبعرف أتكلم وأسترسل وأرتب .. وأختار كلمات لا وكمان مصطلحات كبيرة عليا شوية يجي شويتين .. بس هي دي اللي كانت بتعلي درجتي وثقتي في نفسي وحب المدرسين ليا .. مرة زعلت أوي من مدرس العربي وطبعا في حصة التعبير .. لما لقيته معلم علي موضوعي بالقلم الاحمر وبخط كبير .. وكاتب هذة المقدمة كتبتها زميلة لكي من قبل .. وقتها كنت في قمة غيظي وفرستي لانها فعلا مقدمتي انا و الله انا .. خادتني الشجاعه وقمت قلتله انه ظلمني واني ما غشتش المقدمه من حد وقولي هيا مين اللي كاتبها زي وو اجهني بيها .. فعلا واجهني بيها وكدبتها واثبت حقي وكمان شيء غريب جدا الاستاذ اعتذر لي و الله بفتكرة بعد كده بالخير .. ومرة تانية كنت كبرت شوية تقريبا كده في الاعدادية لقيت مدرسة العربي بتقرب من شوية بشوية ووقفت جنبي وقالت .. موضوع تعبير رائع شدني جدا .. من قوته وانه مباشر ومرتب .. وايقنت وقتها ان صاحب هذا الموضوع شخص بيعرف يكتب كويس .. هيا البنت دي ومش هنسي ايدها وهيا علي رأسي ومكنتش متوقعه ابدا ان كلامها اللي انا مش فاكرة نصه دلوقتي بس فاكرة المشاعر الجميلة اللي حسيتها وقتها .. البنت دي هيا دي وقتها كنت في قمة سعادتي وبتشجعيها ليا بقيت اكتب اكتر و احسن واعمق .. بس للاسف مجموعي مقدرش يدخلني صحافة لكن مدونات النت بتعوضني عن هوايتي شوية